Miimleydan la inagu soo maqiiqay daadkeeda hadaan aniguna moos isaga dhigo maxaa ku jaban ileen miimka waatan laga wada maansoodaye
Maalmahan waxa baraha bulshadu ku kulanto iyo Ardaayada lagu wada caweeyo ka dhex muuqanaysay maanso magaceeda loo asteeyay miimley maansadaas oo uu ibo-furay Abwaan Xasan Daahir weedhsame oo markaad u fiirsato dhamaan Hal-abuurka ka qayb qaatay dhinac kaliya ka wada heenseeyeen taas oo ah mid isugu biyo-shubanaysa Dhaliil midba dhan kaga soo ganayo falaadhaha maansada
Mus-danbeed
Abwaanada mudh-bixiyee
Miimkeeda maansada
Midba ma-hadhadisii
Marag uu ku maamulo
Ku magaabinaayee
Garta meel ku moosoow
Murtidiyo ujeedada
Runta lama masuugee
Xaqaa loo mitibiyaa
Daadkaa la iska moosaa
Miimka iyo mus-cirirtaad
Mus-danbeedkii taladiyo
Maamulkiyo hogaankii
Midigtiinu keentee
Shalay loo mash-xaradiyo
Kuwa qaranka maamula
Maan-laawaayaashaad
Maantana ku sheegteen
Kala maan inay tahaad
Marageeda furaysaan
Sharafbayna mudanyiin
Meel kastood eegtee
Waa mujaahidkiinii
Sakalaha mariikhiyo
Halista u muquurtee
Idinkoon u meel deyin
Waa markii sii tidhaahdeen
Mana gayo xajiintiyo
Mudanuhu xag-xagashada
Miimka aad ku sheegteen
Waa meheradoodii
Dadkan lagu metaaliyo
Muusanawga qiirada
Marka mawdku qaadana
Qabri muunadiisii
Maalmaha dambeetana
Loo sii min-guurshaa
Miisaanka ducadoo
Dadku wada majeertaan
Dhibna lama mutaysteen
Haduu maanta joogaad
maandhow tidhaahdaan
Duulkan meehanawga ah
Dulmi qaran ku maamula
Doqon moogan weeyaan
Maalkiyo nafteedii
Wixii mooro-duugoo
Mililkiyo xumaantaa
Dadkaygani majeertaan
Waxay mooyi doorteen
Kolkii la iska baal maray
Maskaxdii fayaw iyo
Raga kiisa mudanee
Maan-gaab la yidhi mee
Maxaadhkaan duntii wadan
Ku huluuqday maradee
Qalbigaaga oo maqan
Haduu faraha kaa mudo
Yaa kula miskeedsheed
Maanta eersanaysaa
Runta lagama maarmee
Miimleyda maansada
Abwaanada mir-kiciyoow
Ka garaaba maansada
Mililka iyo boogtana
Yaan gacantu guud marin
Caku mudanahaagana
Ceebtaad ku miistiyo
Ha ku noqonin maaley
Maryihiisa heertiyo
Mara-boob sideedii
Mohamed Mahad Muhumed Good
